I write to get real; I read to be able to feel. Again. Hambal ko sa mga estudyante ko. Per ang matuod, mas hambal ko dya sa akon kaugalingon. kadyang mga adlaw nga gusto ko magsulat pay tamad ako magbukas ka akon laptop. Kadya nga may laptop dun ako. Andut bala nagatahaw, nagadura ang desire kon maangkon dun ang isa ka bagay? Patapos run ang term kag kalinung ang akon ginapangita.
Kahapon, Dec. 4, sa wakas, na-redeem ko na ang akon Starbucks journal. For the first time. Indi ko run gusto isipun pa kon sa diin nag-abot ang 100+ nga ginbakal ko kang mga kape. Gusto ko magbakal ka coffee maker pay ang gamay nga gusto ko kinahanglan bubuan pa ka init nga tubig. Te, daw tamad dun ako mag-init-init pa. Kon ang de-koryente man, aguy, kabahul, indi sarang sa maleta ko.
Gusto ko pasaktuon, pasudlon sa sangka maleta ang akon mga gamit. Nanim-us dun ako. 2 ka plastic box ang napa-RORO last Sunday. may sangka Balikbayan box pa. Ang sara sa office para sa mga libro kag pira ka bayo kag mga papeles. Wara man siguro it may mang-ukay.
Handa run gid bala ako? Nagahudan dun ako sa Starbucks. amad man ako magtambay sa office kay puros bukas lang ka internet himuon ko. Gusto ko kang kalinung para magbasa. Ginhuram ko liwan ang Makinilyang Altar ni Luna Sicat. Indi ko gusto mag-uli pa sa balay kay aga pa kag tamadun lang duman ako. Nadumduman ko ang The Old Spaghetti House. Nag-order ako kang tea. 35 pesos. Sige, nami ang music kag may katawhay.
Natapos ko basa ang libro. Daw mahibi ako. Salamat, liwan ako nakabatyag. Nag-text si Nene. nadeliver dun kuno ang mga materyales pay naubos ka bayad sa supplier ang first chunk kang budget. Te, ano bay tana ang pambayad sa laborer: kinahanglan kada semana may matugro kananda kay te, amo man lang ria sarigan man ka pamilya nanda. Sige a. mapadara ako. makita ang kuwarta nga ria. Grand project dyang balay.
Man-an ko, duro pa nga mga his-ul kag pagtiraw ang maabot sa katumanan kadyang balay. Ang importante, hambal ko kay Nene, ok ang communication channel. Indi ko man gusto nga si Tatay lang pirme basulon. Tatay gihapon tana bisan pa may mga transaksyon nga gina-ana-ana na lang pagkatapos ma-shock gilang kami. Te, alangan pabay-an kay tatay mo. Sige lang, makita ang kuwarta nga ria.
Ginakulbaan man ako e. Sa diin ko lang pamuruton ang mga linibo? Nag-abot dun ang bill sa credit card kag Globe. Ok. Pangamuyo na alng nga padayon tugruan mayad ka lawas kag duro pa nga opurtunidad para makakita.
Duro nga mga paminsaron kag istorya ang naglabay sa akon paminsaron. Daw maturo run ang akon luha sa pagsulat kadya sa akon pinsar pay kinahanglan dya magkawas sa mga tudlo kag mabalay sa computer para makuwartahan.
Nag-uli kag. Liwan, nalingaw ako sipal sa cellphone. Lingaw sipal kay makapoy magpaminsar. Kaharadluk magpaminsar. Basi magsuli, magbaliskad ang kalibutan. Nadumduman ko nga wara pa it balus ruman si B. Si K. may balus pay daw indi akun.
Handa run gid bala ako? Andut nga daw ginabatyag ko kadyang mga adlaw ang baratyagon para kay E. Hambal ka sangka miga ko, nagdesisyon tana pakasal kang mabatyagan na nga ang nobyo na ang amo ang gusto na makaimaw hasta sa katubtuban. Aguy, daw kaharadluk paminsaron nga sa amo run ako kadya nga kahigayunan. nadumduman ko man hambal Nene - nga basi bala sa pira ka adlaw, kon san-o na-realize ko nga daw kasubu matuod kang kabuhi kon madura ana, rugto kag wara run gid tana. Indi ko run makontak kay naglain run ang number ukon worst, wara run it cellphone.
Aguy, tabang! Makapoy magpaminsar. Kakurulba.
